Në datat 27 dhe 28 shtator, Shoqëria Rajonale UK Fier zhvilloi seancat dëgjimore për ndryshim të tarifës së shërbimit të ujësjellës kanalizimeve në zonën e saj rajonale të shërbimit me banorët e Fierit, Mallakastrës e Roskovecit, seanca të cilat e ndoqën nga afër përfaqësues nga një ekip përfaqësues i Entit Rregullator të Ujit.

Administratori i Shoqërisë Rajonale UK Fier, Z. Petrit Kanani, së bashku me drejtuesit teknikë e tregtarë prezantuan para qytetarëve propozimin për të ndryshuar tarifën e shërbimit, si një domosdoshmëri për mbulimin e shpenzimeve të operimit të shoqërisë dhe rritjen e cilësisë së shërbimit, që kjo shoqëri ka si objektiva në të ardhmen e afërt.

Në të tri seancat dëgjimore pati një pjesëmarrje të konsiderueshme nga qytetarët e këtyre qyteteve, kryesisht konsumatorë familjarë, të cilët, pasi u njohën me gjendjen e shoqërisë sugjeruan që meqë energjia elektrike përbën një nga zërat kryesorë te kostos së operimit të shoqërisë, të shikohet mundësia për gjetjen e burimeve alternative të rinovueshme me qëllim uljen e këtyre kostove.

Referuar nën akteve ligjore, shoqëritë UK, para se të paraqesin në ERRU propozimin për ndryshim të tarifës së shërbimit, është kusht i detyrueshëm që ato duhet të organizojnë një seancë dëgjimore me publikun, e cila ka si qëllim sqarimin dhe përfshirjen e konsumatorëve në procesin e miratimit të tarifave të shërbimeve UK, si dhe të rritjes së besimit dhe të bashkëpunimit të shoqërisë me publikun. Mbrojtja e interesave të konsumatorëve është thelbi i misionit me të cilin ligji ngarkon Entin Rregullator të Ujit.